ही माणसं अशी का असतात गं अम्मी?
अम्मी..मी रडले..फाटले..तुटले..फुटले...पण त्याला काहीच वाटलं नाही गं...भाईजान सारखाच दिसत होता तो..पण तो माझ्यावर फक्त ओरडत होता..मी त्याला काहीच केलं नाही..काहीच बोलले पण नाही..पण तरी तो मला मारत होता..अम्मी का गं?
त्या दिवशी तुला आठवतं का गं काय झालं होतं अम्मी? तू मला काहीतरी सांगत होतीस..पण मी तशीच बाहेर पळाले..काय सांगत होतीस गं? छे..ऐकायचं राहूनच गेलं गडबडीत...जमलं असतं ना अम्मी, तर आत्ता आले असते बघ..तुझं ऐकलं नाही आणि भाईजान सारख्या दिसणाऱ्या त्याचं ऐकलं..अल्लानी मला त्याचीच शिक्षा दिली बघ..
पण अम्मी, तुझी शप्पथ..मी त्याला सांगितलं..अब्बूंनी अनोळखी माणसांसोबत जायला नाही सांगितलं..मी त्यांचं ऐकलं अम्मी..पण त्यांनी माझं काहीच नाही ऐकलं गं..
अम्मी त्यांच्यामध्ये एक चाचा होते..ते मागे एकदा अब्बूंशी मोठमोठ्याने ओरडून बोलत होते ना? ते...त्यांनी मला जवळ घेऊन पाठीवर हात फिरवला..कित्ती छान वाटलं मला...मग ते मला त्या डोंगराच्या पलिकडच्या एका घरात घेऊन गेले..तू म्हणाली होतीस बघ..आपल्या गावातल्या त्या मोठ्ठ्या घरातल्या चाचांचा अल्लाह तिकडे रहातो म्हणून? तू म्हणाली होतीस तिकडे जायचं नाही..पण ते सगळे मला तिकडेच घेऊन गेले...माझा हात त्यांनी खूप घट्ट पकडला होता अम्मी..खूप खूप घट्ट...मला खूप दुखत होतं..पण ते सगळे हसत होते...मला रडूच येत होतं..तुझी खूप आठवण येत होती अम्मी...
त्यांच्या अल्लाचं घर खूप मस्त होतं...मी तेव्हच ठरवलं..तुझ्यासोबत परत इथे यायचं...पण ते सगळे जण माझ्याकडे बघून हसत होते...मला काहीच कळलं नाही...त्या चाचांनी लगेच माझ्या तोंडावर पट्टी बांधली..आणि मला जोरात ढकललं..मी जमिनीवर पडले..आणि तो भईजानसारखा दिसणारा मला मारायला लागला...मला काहीच कळत नव्हतं..मी ओरडत होते..आणि तो मला मारत होता...
अम्मी..त्या वेळी तुझी कित्ती आठवण आली म्हणून सांगू...तू म्हणाली होतीस...कुणालाही अंगाला हात लावू द्यायचा नाही...पण तो मोठा होता ना अम्मी...मी त्याच्यासमोर छोटीशीच होते..त्यानं ताकदीनं मला पकडलं होतं...आणि तो मला सगळीकडे हात लावत होता अम्मी...मी खूप खूप घाबरले होते...तो माझ्या अंगाला चावत सुटला होता...माझ्या अंगावर लोळत होता...मला काहीच कळत नव्हतं अम्मी...पण खूप खूप दुखत होतं...मी त्यांच्या अल्लाला पण म्हटले..मला वाचव म्हणून...पण त्यांचा अल्लापण आपल्या अल्लासारखाच आहे गं...समोर आलाच नाही...सगळे अल्ला असेच का असतात गं?
थोड्या वेळाने तो उठला...मला खूप त्रास होत होता...मग कुठूनतरी ना ते चाचा माझ्या जवळ आले...मला काय चाललंय काहीच कळत नव्हतं...माझ्या डोळ्यांवर गुंगी येत होती...आणि त्या चाचांचा हात माझ्या चेहऱ्यावर फिरत होता...मग छातीवर...मग पोटावर...आणि मग...मग मला झोपच आली गं अम्मी...डोळ्यांसमोर अंधार झाला...पण माझं सगळं अंग हलत होतंं...दर काही वेळाने...पुन्हा काही वेळाने...पुन्हा पुन्हा काही वेळाने...!
मग मला अचानक एक स्वप्नच पडलं गं...मी तुझ्या कुशीत झोपलेय...तू मला थोपटतीयेस..आणि अब्बूजान म्हणतायत अजून किती लाड करशील तिचे?...तूच लाडावून ठेवलंय तिला...आणि तू माहितीये काय म्हणालीस? असू दे...माझी लाडाची लेक आहे ती...मी अब्बूंकडे बघून हसायला लागले...मी हसत होते आणि माझं अंग हलत होतं अम्मी...
मध्येच मला एकदा जाग आली...त्या चाचांसारखीच अजून दोन माणसं माझ्या बाजूला झोपली होती...मग दरवाजातून त्या पुलिस चाचांसारखा दिसणारा एक माणूस आला...तो माझ्याकडे बघत होता...मला वाटलं आपल्या गावातल्या पुलिस चाचांसारखा तो मला पटकन उचलेल आणि तुझ्या कुशीत आणून सोडेल...पण तसं काहीच झालं नाही गं...
तुला माहितीये तो पुलिस चाचा काय म्हणाला? "मारणारच आहेस का? मग मला पण एकदा"...मला तेव्हाही वाटून गेलं अम्मी...मोठी माणसं पण आमच्यासारखाच हट्ट करतात की! पण त्याचा हट्ट वेगळ्याच गोष्टीसाठी होता गं...त्याचा हट्ट माझ्यासाठी होता...तो माणूस माझ्या जवळ आला...पण मला परत झोप येत होती...माझं अंग हलत होतं फक्त...
अम्मी..आता तर मला काही कळतच नव्हतं...मला काही जाणवतच नव्हतं...मला काही दिसतच नव्हतं...आवाज तर कधीच पोटात जिरला होता...पण अंग हलत होतं...
मध्ये एकदा मला जाग आली अम्मी...माझा एकच डोळा उघडत होता..मी डोळ्याच्या फटीतून बघायचा प्रयत्न केला...त्या भाईजानसारख्या दिसणाऱ्या मुलाच्या हातात मोठ्ठं काहीतरी होतं...ते काय आहे हे बघायचा प्रयत्न मी करत होते...डोळ्याला त्रास होत होता म्हणून मी पापणी बंद केली आणि ती परत उघडायच्या आत माझ्या डोक्यावर मोठ्ठं काहीतरी येऊन आदळल गंं...आभाळच फाटल्यासारखं झालं मला...
मी सुन्न होते...डोळेच उघडत नव्हते...अंग जणूकाही त्या डोंगरावरच्या बडा पत्थरासारखं झालं होतं...आधी हलणारं अंगही आता हलत नव्हतं...कानावर काहीतरी बोलायचा..मध्येच हसायचा..मध्येच ओरडायचा आवाज येत होता...नंतर नंतर तोही येईनासा झाला...हळूहळू सगळंच शांत झालं...पण मला मोकळं वाटायला लागलं...का कुणास ठाऊक...शांत वाटायला लागलं...अगदी तुझ्या कुशीत झोपल्यावर वाटायचं ना? अगदी तस्स...!
अम्मी...माझ्यासोबत असं सगळं करताना त्यांना काहीच का गं वाटलं नाही? मी ओरडत असताना त्यांना काहीच का गं ऐकू गेलं नाही? मी रडत असताना त्यांनी काहीच का गं केलं नाही? मी मोठी असते ना अम्मी, तर त्या भाईजान सारख्या दिसणाऱ्या मुलाला मारलं असतं..त्या चाचांसारख्या दिसणाऱ्या माणसाला दूर लोटलं असतं...त्या पुलिस चाचाच्या तावडीतून पळून आले असते...ही माणसं अशी का असतात गं अम्मी?
(कथुआमध्ये ८ वर्षांच्या काश्मिरी मुलीवर झालेल्या सामुहिक बलात्काराच्या घटनेने संपूर्ण देश हादरला..पण त्याहून जास्त धक्का बसला, तो या बलात्काऱ्यांना वाचवण्यासाठी पुढे आलेल्या संघटना आणि राजकीय नेत्यांमुळे...!!!)
